O Concello de Vigo tampouco presentará a súa oferta turística na caseta da Xunta en Fitur (Feira Internacional de Turismo que se celebra en Madrid do 19 ao 23 de xaneiro), e farao no espazo de Turespaña, nun acto que terá lugar o xoves á primeira hora da tarde, e que contará coa presenza da ministra Reyes Maroto.
Así o avanzou o alcalde da cidade, Abel Caballero, nunha rolda de prensa na que confirmou que o acto de presentación terá lugar ás 16,00 horas, e na caseta de Turespaña, ao contrario que nos últimos anos, nos que a presentación se fixo no espazo reservado pola administración galega.
Cuestionado acerca deste cambio, e tendo en conta que a presidenta da Deputación de Pontevedra, Carmela Silva, tamén anunciou hai unhas horas que a institución provincial estará en Fitur nun espazo propio e non na caseta da Xunta, Abel Caballero limitouse a sinalar que “Vigo está en España” e, ao presentarse no espazo do Goberno “ocupa o lugar que lle corresponde”, no “lugar central da atención en Fitur”, xa que “se está convertendo nun emblema turístico en todo o mundo”.
O rexedor sinalou que, o vindeiro xoves, presentarase a oferta de Vigo deseñada como un “proxecto global” de “ámbito mundial” que pivota, entre outros atractivos, sobre eventos como o Nadal, “a máis importante do planeta”, ou as illas Cíes, que “serán Patrimonio da Humanidade”.