A Fiscalía pide 2 anos e 9 meses de prisión para unha muller acusada de agredir á exmoza da súa actual parella, á que golpeou cunha muleta causándolle diversas lesións, e que será xulgada este mércores na sala do penal 3 de Vigo.

Segundo o escrito de acusación pública, a acusada acudiu co seu mozo ao domicilio da anterior parella del, en Vigo, e alí iniciouse unha discusión entre ambas. Durante a rifa, “co ánimo de menoscabar a integridade física” da exmoza da súa parella, a acusada arrebatoulle á outra muller unha muleta que estaba a usar (debido a que estaba recentemente operada dun nocello) e golpeoulle o brazo con ela.

Como consecuencia do ataque, a vítima sufriu unha fractura dun metacarpiano e unha contusión, o que precisou a inmobilización do brazo cunha férula de xeso. Ademais, quedou como secuela artrose postraumática e dor na man.

Por estes feitos, a Fiscalía considera á acusada autora dun delito de lesións con instrumento perigoso e pide que sexa condenada a 2 anos e 9 meses de cárcere. Tamén reclama que indemnice á vítima en 2.650 euros e ao Sergas en 690,36 euros, pola asistencia sanitaria que necesitou a agredida.