A asociación de consumidores En-Colectivo enviou ao Ministerio de Transportes máis de 3.250 firmas que recolleu na súa web para solicitar ao Goberno de España que asuma as “ilegalidades” cometidas nas prórrogas da concesión da AP-9. Tras a apertura do procedemento de infracción contra España por incumprimento da normativa da Unión Europea nas prórrogas da concesión da autoestrada, esta asociación de consumidores puxo en marcha unha recollida de firmas para “demandar o apoio de toda a sociedade para conseguir que o Estado deixe de illar a Galicia e que os custos dos erros que se produciron nas prórrogas da concesión da AP-9 non teñan que ser asumidos e sufragados por todos os galegos”.

En-Colectivo censura que os galegos “xa levan pagando unhas peaxes que non lles corresponderían desde o ano 2013 e que, se non se anula a segunda prórroga da concesión, seguirán pagando desde o 2023 ata o 2048″. En comunicado, explica que se quere conseguir que o Estado conteste á carta de emprazamento da Comisión Europea recoñecendo que se produciu un incumprimento do dereito europeo e revogando ditas prórrogas.

QUE SEXA GRATUÍTA

O presidente de En-Colectivo e avogado, Diego Maraña, sinala: “Con estas firmas queremos lembrar unha vez máis ao Goberno de España que os galegos levamos anos asumindo os custos de utilizar unha autoestrada que leva amortizada desde o ano 2013 e que debería ser gratuíta, tal e como ocorre noutras comunidades autónomas”. “Ademais, pedímoslle que, en lugar de tentar xustificar o inxustificable ante Bruxelas, asuma os erros cometidos e actúe en consecuencia, anulando a concesión e dando os pasos necesarios para que a AP-9 troque nunha autoestrada gratuíta canto antes”, afirma.

O prazo de dous meses concedido pola Comisión Europea ao Goberno de España para dar unha resposta á carta de emprazamento finalizaría nestes días, en función do día exacto de recepción por parte do Executivo español, explica. Por iso, En-Colectivo solicita que actúe en consecuencia e que informe á sociedade sobre o seu posicionamento respecto deste tema.

En-Colectivo solicitou á Comisión Europea, a través do seu portal de transparencia, que confirme a data exacta na que foi recibida por parte do Goberno de España a carta de emprazamento e o contido literal da mesma. Así mesmo, enviouse á Comisión Europea o informe da Comisión Galega de Competencia que sinala como excesivas e posible fraude de axudas de Estado as compensacións á concesionaria da AP-9 para que sexa tido en conta no expediente de infracción e esíxase ao Estado Español unha rectificación.