A Xunta de Goberno Local de Vigo deu este venres luz verde á continuación do contrato con Air Nostrum, que quedou en suspenso debido á pandemia, e retomaranse os voos a partir do 17 de decembro, neste caso con conexións a Valencia, Sevilla, Málaga e Mallorca.
Así o confirmou o alcalde, Abel Caballero, nunhas declaracións remitidas aos medios, e sinalou que o que queda de contrato con esta aerolínea executarase ata setembro do ano que vén.
Así, retomaranse os voos a Valencia con tres frecuencias semanais, que aumentarán a seis en tempada de verán; os voos a Mallorca empezarán en decembro con seis frecuencias semanais, logo reduciranse a dúas en tempada baixa e volverán aumentar despois.
No caso de Sevilla e Málaga, retomaranse os voos con dúas frecuencias semanais en cada caso, desde xuño a setembro do ano que vén.