Traballadoras do sector da conserva reclaman un convenio colectivo “digno”

A CIG avisa de que non asinará "ningún acordo de incremento salarial inferior ao IPC real de cada ano".

Persoal de conserveiras mobilízase para reclamar un convenio colectivo digno / CIG.

Traballadoras do sector da conserva concentráronse este mércores ante as súas empresas para reclamar un convenio colectivo “digno” despois de que as reunións celebradas a pasada semana en Madrid rematasen sen un acordo.

En concreto, as mobilizacións foron convocadas pola CIG e tiveron lugar ante as instalacións das empresas Cefrico, en Vilagarcía de Arousa; Bolton Food, no Grove ; Albo, en Vigo; Frinsa, en Ribeira e Calvo, en Carballo. Segundo trasladou a central, nas concentracións coreáronse consignas como “Convenio digno nas conservas” e “Non somos escravas, somos traballadoras”.

O sindicato remarcou que non asinará “ningún acordo de incremento salarial inferior ao IPC real de cada ano” para evitar que “sexan as persoas traballadoras as que asuman a perda de poder adquisitivo”. Ademais, dixo que a proposta da patronal para distribuír a xornada de luns a domingo é unha “barbaridade” e supón “recular en dereitos consolidados”, aínda que se mostrou disposto a debater a creación dunha nova quenda para festivos e fins de semana.

CIG tamén lamentou que o empresariado non vexa discriminación salarial por xénero entre as categorías do grupo de fabricación e o de oficios varios e expuxo un incremento salarial adicional para algunhas categorías do primeiro.

Pola súa banda, UGT advertiu na última reunión da mesa negociadora do convenio de que se optaría pola mobilización se a patronal non realizaba avances substanciais e renunciaba ás “súas pretensións de precarización”, segundo fontes da central.

Tamén indicou que nos próximos días celebrará unha asemblea de delegados do sector para analizar a situación e “buscar fórmulas de mobilización conxunta”, xa que un escenario no que cada un vaia “polo seu lado” leva a “debilitar a resposta unitaria dos traballadores”.