A Autoridade Independente de Responsabilidade Fiscal (AIReF) prevé que as corporacións locais alcancen en 2022 un superávit do 0,2% do PIB, unha décima menos que a previsión de peche para 2021, que o organismo que preside Cristina Ferreiro cifra no 0,3%.
Así, realiza unha análise de 25 cidades españolas de máis de 250.000 habitantes. Entre elas atópase Vigo, sobre a que estima que será unha do oito cidades que pecharán 2021 con déficit, pero que sairá dese grupo en 2022.
Deste xeito sinálao no seu ‘Informe Complementario de Avaliación Individual das Liñas Fundamentais dos Orzamentos para 2022 das Corporacións Locais (CCLL)’, no que precisa que esta redución do supéravit dunha décima débese, fundamentalmente, á realización dos gastos financiados cos aforros de anos anteriores, así como ao impacto da liquidación negativa do sistema de financiamento de 2020.
En calquera caso, a AIReF advirte de “importantes incertezas” que poderían alterar este resultado, como o gasto que finalmente se execute no ano e o efecto nos ingresos da recente sentenza do Tribunal Constitucional sobre a plusvalía municipal e a consecuente reforma da regulación actual.
A súa previsión de peche de 2021 para as corporacións locais (superávit do 0,3% do PIB), é froito, segundo a AIReF, da recuperación económica sobre os ingresos, “os cales poderían alcanzar os niveis de 2019”.
Doutra banda, apunta que a capacidade limitada de gasto das corporacións locais moderará a expansión do gasto impulsada pola pandemia e a suspensión da regra de gasto que permite a aplicación dos remanentes de tesouraría de anos anteriores a gasto adicional.
Aínda que once das grandes corporacións locais prevén obter déficit en 2021, as estimacións da AIReF reducen este número a oito: os concellos de Barcelona, Bilbao, Córdoba, Valladolid e Vigo, así como as deputacións de Sevilla e Barcelona e o Cabildo Insular de Tenerife.
Para 2022, só seis das grandes corporacións analizadas prevén obter déficit, aínda que as previsións da AIReF apuntan a que só terán déficit os Concellos de Bilbao e Valladolid.
O organismo sinala que o superávit do grupo de grandes CCLL reduciuse máis dun 80% desde 2018, destacando o caso do Concello de Madrid, que o rebaixou nun 90%.
CONCELLOS AVALIADOS POLA AIREF CON RISCO DE SUSTENTABILIDADE
A AIReF precisa que os 25 concellos con riscos de sustentabilidade seleccionados para a súa avaliación son os mesmos que no anterior ciclo, salvo Sanlúcar de Barrameda e Isla Cristina, que saen da análise por presentar melloras na súa situación de sustentabilidade e os de Arroyomolinos, Lepe e San Fernando de Henares, que entran por primeira vez nesta análise de risco.
Segundo o organismo, todos os concellos seleccionados manteñen a súa cualificación de risco, salvo os de Algeciras, Los Palacios y Villafranca e Navalcarnero, que empeoran a súa cualificación; os de Ayamonte e Totana que melloran; e o de Valdemoro que, unha vez avaliado, sae da análise pola súa notable melloría.
Pola súa banda, a AIReF cualificado con incerteza aos concellos de Alcorcón, Barbate, La Línea de la Concepción, Los Palacios y Villafranca, Navalcarnero e Parla, por non achegar a información solicitada.
Deles, só o Concello de Barbate “incumpriu o deber de colaboración”, dado que non remitiu ningunha información, incumprimento que tamén se produciu nos concellos de Lepe, Arroyomolinos e San Fernando de Henares, que non puideron ser cualificados polo organismo.
A AIReF recomenda a cada unha das grandes entidades locais analizadas neste informe que conten cunha planificación estratéxica de medio prazo que garanta a eficiencia e calidade dos proxectos en que se materialice a expansión do gasto prevista para 2021 e 2022, á vez que analice as implicacións futuras da súa consolidación.
