O alcalde de Vigo, Abel Caballero, achacou a unha lei da Xunta que “abusa contra o Concello” o fallo do Tribunal Superior de Xustiza de Galicia (TSXG) que avala o modelo de cofinanciamento de escolas infantís do Consorcio Galego de Servizos de Igualdade e Benestar na cidade.
Tras ser preguntado este mércores polos medios nunha rolda de prensa, o rexedor afirmou que este fallo se debe a que o Goberno galego “fixo unha lei abusando contra o Concello” que el “non pode levar ao (Tribunal) Constitucional”. “Non lle dá a razón porque teña razón no que fai, dálle a razón porque hai unha lei que o di”, aseverou Caballero en alusión á Lei de servizos sociais de Galicia. Así, incidiu en que o Executivo autonómico “aprobou esa lei”, pero “quen paga” é o Concello de Vigo. “Hai unha lei que é matonismo político”, denunciou á vez que censurou que “os deputados do PP de Vigo vótena para que Vigo pague, en lugar de pagar a Xunta”.
En concreto, o Tribunal Superior de Xustiza de Galicia (TSXG) avalou o modelo de cofinanaciación das escolas infantís e os centros de día tras desestimar o último recurso contencioso-administrativo presentado polo Concello olívico contra as liquidacións do Consorcio correspondentes á primeira metade do curso 2019-2020 nas escolas infantís de Valadares e rúa Palencia.
Nunha sentenza contra a que cabe recurso, o alto tribunal galego sinalou que “en Galicia a atribución aos municipios da prestación dos servizos sociais resulta clara” e lembrou que “se trata de competencias atribuídas como propias aos entes locais pola lexislación autonómica”. Ademais, recalcou que o Concello puido manifestar a súa intención de desvincularse do Consorcio, ao que se subscribiu de modo voluntario, polo que concluíu que a liquidación se axustaba á aplicación do réxime xurídico de cofinanciamento.
