A demolición dos edificios do cuartel de mariñeiría e o cuartel de alumnos da antiga Escola de Transmisións e Electrónica da Armada (ETEA) en Vigo comezou este luns, e supón o primeiro paso cara á construción do centro integral de atención a persoas maiores nesa zona do barrio de Teis.
Estes dous edificios levan anos en desuso e foron construídos nos anos 60 e 70 do século pasado. A demolición dos inmobles liberará a parcela na que a Fundación Amancio Ortega construirá a nova residencia de maiores, cun investimento de 15 millóns de euros. O centro contará con 150 prazas e permitirá, segundo a consellería de Política Social, a creación de 140 postos de traballo.
A administración autonómica confirmou que as obras de demolición terán unha duración aproximada de dous meses. Ademais desta, a Fundación Amancio Ortega impulsará a creación de residencias de maiores no resto de grandes cidades de Galicia.
A construción dunha residencia de maiores nos terreos da antiga ETEA de Vigo xa foi anunciada en marzo de 2017 polo entón conselleiro de Política Social, José Manuel Rey. En setembro de 2019 confirmouse que a infraestrutura se faría con cargo a fondos doados pola Fundación.