O alcalde de Vigo, Abel Caballero, confirmou este xoves que a subida do prezo da luz traducirase nun sobrecusto de 15.000 euros na iluminación do Nadal, unha cifra que cualificou como “menor” en comparación co orzamento que manexa o Concello olívico, de 264 millóns de euros.
Nunha rolda de prensa e a preguntas dos medios, o rexedor referiuse a como repercutirá a subida do prezo da luz no gasto que supón a iluminación do Nadal e, aínda que non desvelou cal é ese gasto, si admitiu que o sobrecusto estimado é duns 15.000 euros nos dous meses que estará aceso.
“O custo das luces de Nadal é insignificante, unha cifra moi baixa. Nós pagamos ao ano algo menos de 5 millóns de euros por toda a luz de todo o Concello”, explicou, e puxo en perspectiva o gasto do Nadal lembrando que neses días Vigo prevé acoller “millóns” de visitas.
Segundo Abel Caballero, a iluminación do Nadal da cidade, con lámpadas Led, ten un custo “irrelevante” e, de feito, puntualizou, gástase máis luz nun campo de fútbol de tamaño medio durante un mes que nos dous meses que están postas en Vigo as luces de Nadal.
PROXECTOS DE TURISMO
Por outra banda, na rolda de prensa, o alcalde explicou que o Concello remitiu ao Ministerio de Industria, Comercio e Turismo 11 proxectos de turismo sustentable para optar a 9,7 millóns de euros de fondos Next Generation da UE.
Segundo explicou, entre as iniciativas que pretenden obter subvención están a recuperación das dunas en Samil, un carril bici entre Samil e Avenida de Europa, un novo centro de recepción de visitantes no Casco Vello, a musealización da fortaleza do Castro, ou a creación dunha nova web-app de turismo.
