O enxeñeiro Francisco Bellas traballa nunha tese doutoral na Universidade de Vigo (UVigo) mediante a que se busca a creación dun sistema para predicir mareas vermellas en tempo real e cuxos resultados permiten avanzar cara a ese obxectivo a medio prazo.
A investigación, dirixida polos docentes do Departamento de Física Aplicada Jesús Torres e Luís González, proba con éxito algoritmos de aprendizaxe automatizada que non se aplicaron neste campo, como AdaBoost e Random Forest, segundo detallou a universidade.
Ademais, incrementouse a variedade de datos sobre as Rías Baixas coa incorporación de novas variables ao sistema de predición, como nutrientes, niveis de clorofila e variacións de temperatura, para mellorar os resultados. O autor da tese tamén explicou que se traballa para incluír na predición imaxes do satélite Sentinel-3 “procesadas con algoritmos específicos para a detección de blooms”.
Así mesmo, considerou “perfectamente viable” desenvolver un sistema predictivo a medio prazo dado que se pode dispor deses datos en tempo real na actualidade. Tamén sinalou que se comezou a preparación desta ferramenta, aínda que este proxecto “está parado por motivos económicos e temporais”. Por iso, incidiu na necesidade de investir en recursos materiais e humanos para poder pór en marcha o sistema.
En concreto, o traballo enmárcase nun proxecto europeo de desenvolvemento de produtos innovadores baseados en teledetección e datos ambientais para monitorar ecosistemas costeiros denominado CoastObs. Para levar a cabo a tese, Bellas recolleu datos facilitados por Portos do Estado e o Instituto Tecnolóxico para o Control do Medio Mariño de Galicia (Intecmar) durante as últimas décadas.