Piden unha condena “social e política” á agresión do dono dun can a unha moza en Vigo

A Fundación Franz Weber trasladoulle a súa "solidariedade" á vítima, que foi golpeada por un home cando lle recriminou que estaba maltratando o can.

A agredida en imaxes de RRSS/Noa Alonso
A agredida en imaxes de RRSS/Noa Alonso

A Fundación Franz Weber trasladou este xoves a súa “solidariedade” e apoio a unha veciña de Vigo que, a pasada semana, foi brutalmente agredida polo dono dun can, ao que recriminara que maltrataba o animal.

Esta ONG reclamou ás administracións públicas que manifesten a súa condena polo ocorrido, para que eses feitos teñan “o reproche social e político que merecen”. Así mesmo, lembrou que hai “abundante literatura científica” que vincula os malos tratos animais co uso da violencia cara ás persoas, en especial cara a mulleres, menores e persoas vulnerables.

Tras a agresión sufrida por esta moza, que acabou con fracturas na cara e golpes polo resto do corpo, a Fundación Franz Weber instou a apartar o can maltratado do seu dono, e advertiu de que este individuo “non debería ter baixo a súa responsabilidade ningún ser vivo”.

AGRESIÓN

A agresión produciuse o pasado venres, na zona de Bouzas, cando a vítima se atopaba paseando coa súa cadela e cunha amiga. Ambas viron a este home, que maltrataba o seu can, e recrimináronlle a súa actitude.

O home ausentouse do lugar despois de dirixirse a elas de forma irrespetuosa e, pouco despois, volveu aparecer, cando a vítima e a súa acompañante se dirixían a tomar algo a un establecemento. Entón, de forma sorpresiva, agarrouna polo pelo desde atrás e golpeouna contra o capó dun coche, e a continuación propinoulle golpes e patadas.

O suposto agresor foi detido pola Policía Nacional e posto a disposición do xulgado, que determinou a súa posta en liberdade, investigado por un delito de lesións, e coa prohibición de achegarse a menos de 300 metros da vítima.