O pleno do Concello de Vigo deu luz verde este mércores, en sesión ordinaria, á modificación da ordenanza fiscal xeral (e tamén ás relativas a taxas de medio ambiente e servizos de baleirado de pozos negros e fosas sépticas), cos votos favorables do grupo socialista e o voto contrario de todos os partidos da oposición.
O concelleiro de Facenda, Jaime Aneiros, defendeu que hai “unha conxelación total” das taxas e impostos municipais, que non se actualizarán co IPC, o que supón que o Concello deixará de ingresar máis de 4 millóns de euros. A isto súmanse as bonificacións que xa se aplican a diversas actividades e servizos, e que suman uns 17 millóns de euros.
O edil do grupo socialista insistiu en que Vigo ten “a presión fiscal máis baixa de Galicia” e, ante a insistencia do PP para que se baixen os impostos, instou a este grupo a “ser valente” e dicir “que servizos recortaría con esa baixada de impostos“.
O portavoz do grupo ‘popular’, Alfonso Marnotes, denunciou que “é unha provocación” levar a pleno unha modificación de taxas que, en realidade, só supón deducións por valor de 220.000 euros. “É unha burla dicir que conxelan impostos cando, antes da pandemia, subíronos un 2,5 %, e encima non son capaces de executar o seu orzamento de gasto (…), faría falta unha revisión completa de todas as ordenanzas fiscais”, proclamou, á vez que criticou que, desde que Abel Caballero é alcalde, os vigueses pasaron de pagar 435 euros ao ano en impostos municipais, a pagar 515 euros.
O portavoz de Marea de Vigo, Rubén Pérez Correa, lamentou que non se adopten medidas fiscais e “bonificacións en serio”, tendo en conta que o Concello recibirá ingresos extra no marco da estratexia de recuperación post-pandemia e prognosticou que, se o goberno local mantén a liña dos últimos anos, deixará de executar “entre o 40 e o 60 %” dos investimentos.
Na mesma liña, o concelleiro do BNG, Xabier Pérez Igrexas, denunciou a “inejecución” orzamentaria que, vaticinou, “en 2021 baterá marcas”. “Este goberno local é unha máquina de xerar remanentes”, afirmou e lamentou que o goberno non aproveite a boa situación finaciera da administración municipal para implementar “unha fiscalidade socialmente máis xusta”, con maiores imposicións ás grandes empresas e axudas directas a sectores como os pequenos comerciantes.
AMPLIACIÓN DO IFEVI
Por outra banda, o pleno tamén aprobou unha moción de PSOE (cos únicos votos deste grupo, a abstención de Marea e BNG, e o voto contrario do PP) na que se insta á Xunta de Galicia a “asumir a responsabilidade política, coas dimisións que correspondan” por non conseguir executar a ampliación do Instituto Feiral de Vigo, Ifevi, no prazo prometido, “ocasionando un grave prexuízo a Conxemar e á economía da cidade”.
O portavoz socialista, Carlos López Font, defendeu esta moción denunciando os “reiterados atrasos e entorpecimientos” por parte da Xunta no que respecta a actuacións en Vigo, pondo como exemplo o recinto feiral, e concluíu que a cidade está “esquecida e boicoteada” por parte do goberno de Núñez Feijóo.
Respecto diso, criticou a “pasividade” e a retardación de trámites para abordar a ampliación do Ifevi, así como as “mentiras” da conselleira Ethel Vázquez, que en maio pasado visitou as obras e asegurou que estarían terminadas en setembro.
O PP denunciou que a moción do grupo de goberno “cheira a oportunismo e demagoxia”, cando é a Xunta a que investiu máis de 17 millóns de euros nese recinto, e cando as últimas ampliacións foron posibles grazas a unha lei autonómica que permite facer as obras a pesar da anulación da PXOM vigués.
Pola súa banda, tanto Marea como BNG criticaron que o Ifevi se utilice na confrontación política entre Abel Caballero e Núñez Feijóo, e ironizaron sobre as acusacións de atraso do goberno local. Así, lembraron aos edís socialistas os prazos incumpridos en proxectos municipais como a reforma do estadio Abanca Balaídos, as ‘humanizacións’, a Vía Verde ou o Paseo de Bouzas.
Na sesión plenaria deste mércores aprobáronse outras mocións, como a presentada polo PSOE para instar o goberno galego a retirar o anteproxecto de lei para mellorar a xestión do ciclo da auga; ou outra para pedir á Xunta que transfira 2 millóns de euros ao Concello para custear os comedores, aulas matinais e bolsas de libros e comida para escolares.
