Concello e Deputación acordan acometer actuacións de mellora da mobilidade e recuperación ambiental en Vigo

O alcalde asegura que "haberá máis praia, ao gañarse unha superficie de 10 metros".

A presidenta da Deputación de Pontevedra, Carmela Silva, e o alcalde de Vigo, Abel Caballero, ante os planos do proxecto para rexenerar o sistema dunar de Samil, que cofinancian ambas as institucións.. CONCELLO DE VIGO

O alcalde de Vigo, Abel Caballero, e a presidenta da Deputación de Pontevedra, Carmela Silva, presentaron este mércores o acordo de colaboración entre ambas as institucións que, no período 2021-2023 permitirá acometer obras na cidade por valor de case 16 millóns de euros.

O Concello de Vigo porá 5 millóns de euros e a Deputación case 11 millóns para acometer 9 actuacións de mellora da mobilidade urbana e de recuperación ambiental. “Haberá máis praia, ao gañarse unha superficie de 10 metros”, asegurou o alcalde.

Ademais desta obra, o convenio inclúe traballos de humanización en Martínez Garrido (fase IV) por 1,2 millóns de euros; humanización en San Roque, entre Gregorio Espino e Reiseñor, por 1,4 millóns; ou a de Avenida Castelao, entre a rotonda do barco e Darío Durán, por 1,5 millóns.

Así mesmo, prevense varias actuacións dentro do programa Vigo Vertical, para a implantación de ascensores ou medios mecánicos de mobilidade entre Camelias e Hispanidade, entre Travesía de Vigo e Aragón, ou entre Jacinto Benavente e Torrecedeira.

Finalmente, tamén se executarán obras como a cubrición do patio do CEIP Javier Sensat de Alcabre, por máis de 360.000 euros; ou melloras do firme en diferentes viarios, por máis de 3 millóns de euros.