O dono do Grupo Rodman presenta a súa candidatura a presidir o Círculo de Empresarios de Galicia

Manuel Rodríguez Vázquez, dono do grupo Rodman, tamén deu a coñecer ás persoas que o acompañan na candidatura, entre as que figuran, como vicepresidentes, Josefina Fernández Miguélez (conselleira delegada de DomusVi) e Víctor do Canto (presidente da construtora Civis Global).

Manuel Rodriguez, presidente de Rodman

Manuel Rodríguez Vázquez, dono do grupo Rodman (de construción naval), anunciou a presentación da súa candidatura para presidir o Círculo de Empresarios de Galicia, que abriu o proceso para renovar a súa xunta directiva, tras esgotarse o mandato de Patricia García.

A través dun comunicado, o empresario vigués confirmou que reúne os requisitos para postularse ao cargo (é socio da organización empresarial desde 1997 e conta cos avais necesarios) e que, por tanto, optará a ser elixido na asemblea extraordinaria convocada para o próximo 29 de setembro.

Así mesmo, tamén deu a coñecer ás persoas que o acompañan na candidatura, entre as que figuran, como vicepresidentes, Josefina Fernández Miguélez (conselleira delegada de DomusVi) e Víctor do Canto (presidente da construtora Civis Global).

A lista complétase con Alberto Rocha (secretario), Enrique González (tesoureiro), Emilio Pérez Neto, Patricia García, María Borrar, Salvador Fernández-Alvariño, María Mouriño, Luís Beraza, Enrique García Chillón e Juan Güell (vogais).

Manuel Rodríguez é o presidente do Grupo Rodman, que integra as divisións MetalShips&Docks, cun estaleiro en Vigo para a construción de buques de aceiro; Rodman Polyships, que constrúe en embarcacións de recreo e patrulleiras de poliéster e semirrígidas en Moaña, e Neuvisa dedicada ás embarcacións neumáticas.