Catro persoas resultaron feridas nun accidente en Mos con dous coches inmplicados, segundo informa o servizo de emerxencias 112 no seu parte de incidencias.
Os catro feridos foron evacuados polos servizos sanitarios, dous ao Povisa de Vigo e os outros dous ao centro hospitalario Concheiro, tamén da cidade de Vigo.
O 112 Galicia tivo constancia do sinistro ao redor das once desta noite pasada. Foi a esa hora cando varios particulares alertaban dunha colisión entre tres vehículos na A-55, nas curvas de Tameiga, dirección Vigo.
En concreto, indicaban que un dos vehículos envorcara despois de chocar contra a mediana da autovía e que os outros dous turismos chocaron contra el. Os Bombeiros do Porriño e os profesionais do Servizo de Urxencias Sanitarias de Galicia-061 acudiron ao momento ao non ter constancia nese momento se habia persoas atrapadas e feridas. Tamén, os axentes de Tráfico e os efectivos do Servizo de Emerxencias de Mos.
Unha vez no lugar, os Bombeiros descartaron o uso do material de excarceración e os axentes de Tráfico confirmaron que unicamente foron dous coches os implicados. Aínda que non parecían revestir gravidade, catro persoas precisaron ser trasladadas polos servizos sanitarios.
