O Porto de Vigo amplía instalacións e inclúe unha ‘sala de inadmitidos’ con 8 prazas

Ademais de posibles 'polisóns', a 'sala de inadmitidos' está preparada para albergar, se fose necesario, a persoas (cruceristas, tripulantes, mariñeiros...).

O presidente do Porto de Vigo, Jesús Vázquez Almuíña, e o comisario de Vigo-Redondela, Juan José Díaz Jiménez, visitan as novas instalacións da Policía Nacional na Estación Marítima.

O Porto de Vigo ampliou as instalacións da Policía Nacional na Estación Marítima, no Peirao de Transatlánticos e, ademais de reacondicionar as oficinas, vestiarios e aseos, creou unha ‘sala de inadmitidos’ con capacidade para 8 persoas, a primeira destas características nun porto galego.

Trátase dunha actuación que permitirá ampliar o confort dos funcionarios que desempeñan o seu labor na terminal viguesa, que é fronteira marítima con outros países, e incorpora unha dotación que antes non existía, a ‘sala de inadmitidos’, onde poderán aloxarse temporalmente aquelas persoas que cheguen a porto de forma irregular (polisóns), mentres as autoridades resolven sobre a súa situación.

Este espazo, habilitado na segunda planta da Estación Marítima, conta con dúas habitacións con catro camas cada unha, aseos, e unha pequena sala de estar, todo iso con medidas de seguridade ‘branda’, para permitir a custodia das persoas que teñan que permanecer no devandito espazo.

Segundo explicou o presidente do Porto, Jesús Vázquez Almuíña, esta actuación supuxo un investimento de 363.000 euros, e enmárcase dentro dun programa global de melloras da terminal de Transatlánticos (con investimentos previstos por encima dos 1,7 millóns de euros).

As obras permiten dar cumprimento á normativa Schengen e facilitar o labor do cinco funcionarios de Policía Nacional que, de maneira fixa e durante todo o ano, desempeñan o seu labor na Estación Marítima.

Vázquez Almuíña explicou que, ademais de posibles ‘polisóns’, a ‘sala de inadmitidos’ está preparada para albergar, se fose necesario, a persoas (cruceristas, tripulantes, mariñeiros…) que deben permanecer illadas debido á pandemia de Covid “ou outras posibles pandemias futuras”.