Tres dos 12 tripulantes do pesqueiro de capital galego e bandeira británica ‘Manuel Laura’ foron ingresados no Hospital Álvaro Cunqueiro de Vigo afectados por coronavirus, mentres que o resto permanece en corentena a bordo.
Así o informaron fontes sanitarias, que explicaron que do resto da tripulación, tres mariñeiros deron negativo no test PCR que se lles practicaron polo equipo desprazado ata o peirao e os demais foron positivos. As mesmas fontes sanitarias sinalaron que os tripulantes que non necesitaron hospitalización atópanse a bordo do barco en situación corentena.
O pesqueiro de capital galego e bandeira británica ‘Manuel Laura’, cuxa tripulación é maioritariamente da zona do Morrazo, atracou na tarde deste martes no porto de Vigo, procedente de Irlanda.
