Servizos sanitarios atenden unha muller tras incendiarse o baixo da súa vivenda en Vigo

O incidente tivo lugar na parroquia de Coruxo.

Camión de bombeiros / galiciaartabra.com

Unha muller tivo que ser atendida polos servizos sanitarios por mor dun incendio declarado no baixo da súa vivenda en Vigo. Segundo informaron os Bombeiros de Balaídos, que se dirixiron ao momento nada máis ser alertados polo 112 Galicia, arderon dous conxeladores almacenados na planta baixa do inmoble, o que provocou unha intensa fumareda na estancia.

Foi un particular quen, sobre as 16,15 horas, chamou ao 112 Galicia para pedir axuda. Indicaba que ardía unha casa na parroquia de Coruxo e que había persoas tentando conter as lapas. Ademais de pasar aviso aos bombeiros da cidade, púxose en alerta aos profesionais de Urxencias Sanitarias de Galicia-061, á Policía Local e aos efectivos de Protección Civil de Vigo.