A Xunta exclúe 11 vivendas das expropiacións no barrio de Navia

O convenio presentado aos propietarios recollerá as condicións da exclusión, que incluirán o mantemento da vivenda construída e a adaptación das parcelas ao previsto no proxecto.

O presidente da Xunta, Alberto Núñez Feijóo, durante unha visita ao barrio vigués de Navia, para presentar as últimas fases de urbanización da zona, que inclúen 1.600 vivendas protexidas.

A Xunta iniciou a tramitación para excluír 11 vivendas existentes no ámbito de ampliación de chan residencial do barrio de Navia do proxecto de expropiación de terreos. En concreto, un total de 11 leiras poden excluírse da expropiación por acoller vivendas construídas que o proxecto urbanístico contempla como compatibles coa nova ordenación, polo que se poden manter dentro da ampliación do ámbito, segundo trasladou a Consellería de Medio Ambiente, Territorio e Vivenda.

Unha vez iniciados os trámites, a Xunta proporá a cada propietario un convenio que recollerá as condicións da exclusión, que incluirán o mantemento da vivenda construída e a adaptación das parcelas ao previsto no proxecto, polo que parte do chan expropiarase.

O convenio establecerá tamén o valor do chan que se pode expropiar e a cota de urbanización que deberá abonar cada propietario. Así, as vivendas excluídas da expropiación serán aquelas cuxos donos acepten o convenio proposto polo Instituto Galego da Vivenda e Solo (IGVS) de acordo coa normativa vixente.