O alcalde de Vigo, Abel Caballero, afirmou que a aprobación do proxecto de urbanización do barrio de Navia require que a Xunta “corrixa” os aspectos da documentación cuxa modificación lle solicitou o Concello.
Así se pronunciou, en rolda de prensa, despois de que a conselleira de Medio Ambiente, Territorio e Vivenda, Ángeles Vázquez, remarcase que o Concello dispón da documentación correspondente ao tres fases da urbanización desde comezos do pasado mes de maio e volvéselle a pedir a “necesaria aprobación do proxecto”.
Ante esta situación, o rexedor olívico concluíu que a conselleira “equivócase ou mente”, aínda que advertiu de que “probablemente amenta”. Deste xeito, confirmou que o Goberno galego remitiu a documentación correspondente ao Concello, pero indicou que este último “lle enviou un numero de cousas que se teñen que corrixir” para que se poida dar luz verde ao plan de urbanización. “Úrxenos que o aprobemos moi rápido e son eles os que teñen que enviar a documentación”, censurou.
Por tanto, sinalou que a documentación para a aprobación da urbanización do barrio vigués trasladada ao Concello “non está completa” e preguntouse “para que veñen mentir” os altos cargos da Xunta á cidade.
Noutra orde de cousas, Abel Caballero volveu a instar o Executivo autonómico a que “diga como vai resolver o problema de Barreras”, xa que, segundo remarcou, ostenta as competencias en materia de industria.
Así, lamentou que “nunca ouve á Xunta falar de Barreras” a pesar de que este estaleiro representa “a industria máis importante de Galicia en crise neste momento”. Por iso, chamou ao Goberno galego a “delegar” nel as competencias correspondentes. “Se me delegan a min a competencia de industria, encárgome eu“, aseverou.
