O alcalde de Vigo acusa á Xunta de “querer negocio” para a concesionaria do Hospital Cunqueiro co seu aparcadoiro

Di que a cidadanía "non pode pagar" por estacionar o seu vehículo "nun hospital que esta a 8 quilómetros do centro" da urbe olívica.

O alcalde de Vigo, Abel Caballero, en rolda de prensa. CONCELLO DE VIGO

O alcalde de Vigo, Abel Caballero, acusou ao presidente da Xunta, Alberto Núñez Feijóo, e o conselleiro de Sanidade, Julio García Comesaña, de “querer negocio” para o propietario maioritario da concesionaria do Hospital Álvaro Cunqueiro, o fondo francés Meridiam, co seu aparcadoiro.

En rolda de prensa, o rexedor olívico insistiu en que o Concello busca construír outro estacionamento nun emprazamento dotado con “400 ou 500 prazas que sexan gratis” próximo ao hospital nun terreo cuxa titularidade corresponde ao Goberno galego, pero censurou que este último “non lle venda o chan”.

Abel Caballero achacou esta situación a que “o conselleiro e o presidente queren negocio” para o fondo francés, que “obtén benefecio dos aparcadoiros do hospital”.

Así as cousas, reprobou que o titular de Sanidade presuma de que o estacionamento do centro sexa “de pago” mentres “hai á beira un gratis do Concello”. Así, incidiu en que a cidadanía “non pode pagar” por estacionar o seu vehículo “nun hospital que esta a 8 quilómetros do centro” da urbe olívica.