O comité da empresa concesionaria do transporte urbano de Vigo, Vitrasa, convocou catro xornadas de folga ante “incumprimentos” do convenio colectivo.
En concreto, a representación dos traballadores detallou que os paros están previstos para os días 3, 4, 7 e 8 de agosto.
Ademais, o comité de empresa de Vitrasa remarcou que “leva meses denunciando todo tipo de incumprimentos”. Así, afirmou que se produciu “un atraso no pago das retribucións” e puxo o foco na “falta de persoal” e os “cambios de xornada laboral para paliar as deficiencias coas que se presta o servizo”.
Precisamente, o pasado ano, traballadores concentráronse para denunciar “incumprimentos” por parte da empresa e o goberno local.
