O delegado do Estado no Consorcio da Zona Franca de Vigo, David Regades, presentou á secretaria xeral de Innovación, Teresa Riesgo, o proxecto de fábrica de circuítos fotónicos da entidade e a Universidade de Vigo (UVigo) como “unha oportunidade para o sistema de innovación español”.
No marco dunha reunión mantida este xoves en Madrid, Regades trasladou a Teresa Riesgo o obxectivo da creación desta fábrica de circuítos fotónicos en Vigo e a necesidade de consolidar a colaboración co Centro para o Desenvolvemento Tecnolóxico Industrial (CDTI), que ela preside.
Nesta liña, o delegado do Estado na Zona Franca reivindicou que esta factoría “suporía a primeira instalación destas características na Península Ibérica e o sur de Europa” e que podería “apoiar” o traballo de pemes e grandes empresas. Tamén defendeu que permitirá o desenvolvemento dos primeiros produtos de ‘startups’.
Deste xeito, aspírase a implicar ao Ministerio de Ciencia e Innovación na procura de socios industriais e a constitución do proxecto nunha empresa. Pola súa banda, a secretaria xeral valorou a proposta e expuxo ideas para a súa consolidación.
Ademais, ao encontro asistiron o docente da UVigo Francisco Díaz; a directora xeral de Zona Franca, Inés González; e o director de Avaliación e Cooperación Tecnolóxica do CDTI, Carlos da Cruz Molina.
PROXECTO
En concreto, Zona Franca e Universidade de Vigo presentaron un proxecto para instalar na cidade olívica unha Fábrica de Circuítos Fotónicos e Laboratorio de I+D para o que se buscaba captar fondos europeos do mecanismo Next Generation.
A iniciativa conta cun orzamento estimado de 50,4 millóns euros e podería entrar en funcionamento en tres anos. Así mesmo, calcúlase que pode xerar 150 postos de traballo directos de alto valor técnico e 700 indirectos no sistema nacional de I+D, provedores, ‘startups’ e pemes.