Un home de 39 anos con nacionalidade paraguaia, J.B.P.V., foi denunciado en Vigo por conducir sen unha autorización administrativa válida en España e baixo efectos do alcol.
Segundo detallaron fontes policiais, os feitos tiveron lugar este domingo sobre as 3,00 horas da madrugada, cando os axentes deron o alto a un vehículo que realizaba unha condución errática na rúa Paradiña.
Tras observar que o condutor presentaba síntomas de atoparse baixo o efecto de bebidas alcohólicas, realizáronlle as probas perceptivas, que deron un resultado positivo de 0’43 e 0’45 miligramos por litro en aire expirado. Así, foi denunciado por este motivo e por conducir o vehículo sen unha autorización administrativa válida en España ao non realizar o troco dun permiso obtido no estranxeiro.
Noutra orde de cousas, pouco antes das 4,00 horas deste sábado, unha patrulla deu o alto a un vehículo de cinco prazas no que viaxaban sete persoas. Ademais, ao comprobar que o condutor, un home domiciliado en Vigo de 34 anos, A.G.E., presentaba síntomas compatibles co consumo de alcol, realizáronlle o correspondente. Dado que arroxou un resultado positivo, con taxas de 0’49 e 0’45 mg/l, foi denunciado.
CIRCULACIÓN EN PATINETE ELÉCTRICO
Por outra banda, ao redor das 5,00 horas deste sábado, os policías identificaron o condutor dun patinete eléctrico que circulaba en horario nocturno sen facer uso de ningunha iluminación pola rúa Urzáiz, D.E.B.A., de Vigo e 27 anos de idade.
Así, observaron que presentaba síntomas de consumir drogas e realizáronlle as correspondentes probas, que arroxaron un resultado positivo en THC. Como consecuencia, o home foi denunciado administrativamente e inmobilizouse o seu vehículo.
Ao día seguinte, sobre as 17,42 horas, foi interceptado de novo e arroxou resultados positivos en cannabis e THC, polo que foi sancionado administrativamente e inmobilizouse o seu vehículo.
