O alcalde de Vigo, Abel Caballero, sinalou que a actuación policial, a coordinación co sector hostaleiro e o peche dalgunhas zonas da cidade permitiu “controlar o botellón” na cidade durante este fin de semana.
En rolda de prensa, o rexedor remarcou que se actuou de modo “coordinado”, o que permitiu obter “un resultado moi bo” e indicou que, tras unha reunión que tivo lugar este luns, volverá manter un encontro con representantes do sector hostaleiro este xoves. “Seguimos xuntos, a hostalaría e o Concello facendo fronte á pandemia”, proclamou Caballero, que augurou que “se terán bos resultados en dez días” de “a boa acción” deste fin de semana.
Así, afirmou que foi posible “controlar o botellón” co peche dalgunhas zonas e a actuación da Policía Local e Nacional, aínda que se requiriu de “moito esforzo” dada a presenza dalgúns grupos, que levou que se realizase “un seguimento e unha vixilancia intensa”.
Por outra banda, Abel Caballero indicou que o servizo de axuda no fogar ofrece novas prestacións ás persoas con dependencia entre as que se inclúen a atención psicolóxica, a podoloxía e a barbaría.
PRAIA DE MANQUIÑA
Noutra orde de cousas, remarcou a súa “oposición total” á incorporación da praia da Manquiña, en Teis, como zona de servizo da Autoridade Portuaria, o que sinalou que se trasladou nas alegacións presentadas á Delimitación de Espazos e Usos Portuarios (DEUP). En concreto, este documento está en tramitación e o equipo redactor está a recoller suxestións e alegacións.
Así as cousas, o alcalde explicou que o goberno local trasladou ao Porto “por escrito e en reunións” a súa “oposición” a que o areal se converta en zona portuaria, o que suporía que se deixaría de permitir o seu uso a bañistas. Ademais, sinalou que o Plan Xeral de Ordenación Municipal (PXOM), que se atopa en tramitación, clasifica esa zona como chan rústico de especial protección de costas “e, por tanto, de libre utilización cidadá”. “É o de sempre. É Núñez Feijóo sempre danando a esta cidade”, lamentou.