O albergue do Casco Vello de Vigo será inaugurado o 29 de xuño

A delegada da Xunta en Vigo, Marta Fernández-Tapias, lamentou a actitude do alcalde, Abel Caballero, que "segue impedindo a sinalización do Camiño Portugués pola Costa".

O vicepresidente da Xunta, Alfonso Rueda, e a delegada territorial, Marta Fernández-Tapias, xunto a Juan Manuel López-Chaves, familiares e membros de Amigos dos Pazos, ante o albergue de peregrinos do Berbés.

O albergue de peregrinos que a Xunta construíu nun edificio rehabilitado do Casco Vello de Vigo, e que levará o nome de Juan Manuel López-Chaves, será inaugurado o próximo 29 de xuño, segundo confirmou este mércores a delegada territorial do goberno galego na cidade.

Este aloxamento, situado na Praza do Berbés e con capacidade para acoller a 93 persoas, está xa acondicionado tras finalizarse os traballos e retirarse todos os elementos da obra, incluído o polémico cartel colocado na fachada e polo que o Concello anunciou un expediente sancionador polo incumprimento da ordenanza municipal.

Marta Fernández-Tapias puxo en valor o “compromiso” do goberno galego para que a cidade contase con este albergue de peregrinos, no que se investiron 1,6 millóns de euros.

Fronte a este compromiso, a delegada lamentou a actitude do alcalde, Abel Caballero, que “segue impedindo a sinalización do Camiño Portugués pola Costa” ao seu paso polo termo municipal, e máis nunha época na que o turismo é necesario para a reactivación económica.