O alcalde de Vilanova denuncia unha “persecución” por ter chamado “ancián” a Abel Caballero

Asegura que o rexedor olívico "engana" os seus votantes ao dicir que se presentará de novo con 77 anos. "Acabaría con 81 anos e non está en condicións".

O alcalde de Vigo, Abel Caballero / Concello de Vigo.

O alcalde de Vilanova de Arousa, o popular Gonzalo Durán, informou de que recorrerá nos próximos días a sentenza que o condena como autor dunha falta leve por chamar “chacha para todo” á presidenta da Deputación de Pontevedra, Carmela Silva, e avisa de que “non” o van a “calar”.

En declaracións a Europa Press, o rexedor asegurou que co seu recurso busca demostrar “quen é esta xente de Vigo”. “É unha persecución política”, asegurou o alcalde, que sostén que o seu enfrontamento cos socialistas “non ten que ver” con que dixese “o de chacha para todo” senón que se trata dunha “persecución” por afirmar que o alcalde de Vigo, Abel Caballero, “era un ancián”.

Gonzalo Durán sinalou que, dentro de dous anos, cando se celebren as próximas eleccións municipais, Caballero terá 77 anos, polo que a súa próxima presentación aos comicios supón “un engano aos vigueses”. “E aí hai unha pelexa entre varios, está Carmela, porque se Abel cae, ela vaise e non queda de herdeira, pona na rúa porque é unha persoa que non vale para nada”, reafirmouse.

“Entón, calquera que diga iso, ameázana, perséguena, que é o que fan comigo”, manifestou para asegurar que, como dixo no xulgado, chamou “ancián” a Abel Caballero porque “ten máis de 70 anos” e o dicionario pon que “é un ancián”.

“Por tanto, o problema que hai detrás é que a era Abel Caballero está acabada”, insistiu para sinalar que o “último acto político” do rexedor vigués será “presentarse a unhas eleccións para non ser despois alcalde”. “Porque non o vai a ser, porque acabaría con 81 anos e non está en condicións”, apuntou.

“Despois está Regades, está esta muller, que saben que se acabou a forza de Vigo, acabouse a Deputación e acabouse todo e, entón, perseguen… tratan de calar ao que diga algo iso. E eu non me vou a calar, non me dá a gana”, insiste. “É un ataque á democracia, á liberdade de expresión, queren que me cale e non vou a calar”, incidiu para soster que seguirá dicindo o que dixo “aquel día”. “Está a acabarse o réxime de Vigo, Abel está nas últimas, e que o coiden moito, que eu non lle desexo ningún mal”, apuntou.

CONDENA POR FALTA DE RESPECTO

En concreto, o xulgado de instrución número 3 de Pontevedra acordou condenar a Gonzalo Durán Hermida como autor dun delito leve de falta de respecto e consideración debida á autoridade no exercicio das súas funcións por chamar “chacha para todo” á presidenta da Deputación, Carmela Silva.

O rexedor foi denunciado como autor dun delito de inxurias contra autoridade pública por unhas declaracións aos medios de comunicación nas que se dirixiu a Carmela Silva. En concreto, afirmou que a administración provincial “é un órgano político gobernado polo Concello de Vigo, polo ancián Abel Caballero e o seu chacha para todo, que é Carmela Silva”.

O fallo xudicial entende que esas declaracións do alcalde do Partido Popular “evidencian unha falta de respecto ou menosprezo cara ao principio de autoridade representado pola presidenta da Deputación de Pontevedra, que excede o normal exercicio do dereito fundamental de liberdade de expresión”.

A sentenza condena a Gonzalo Durán á pena de 1 mes de multa cunha cota diaria de 12 euros, coa responsabilidade persoal subsidiaria en caso de falta de pagamento dun día de privación de liberdade por cada dúas cotas diarias non satisfeitas, e ao pago das costas procesuais.

1 COMENTARIO

  1. Xa quixera este señorito maleducado e facha chegarlle aos calcañares a Abel ou a Carmela, é apenas iso un señorito maleducado alcalde dunha aldea ao lado de Vigo e que non fai nada, e ainda por riba atrevese a criticar, non polas suas actividades poliicas, que poden ser discutibles e cada un ten a sua opinion, senon desde un punto de vista mais propio de programas de Tele5. Señor Duran por moito que soñe vostede nunca chegara aser presidente da deputacion, o seu teito politico xa chegou, so lle queda seguir chupando do Concello de Vilanova, se os cidadans llo seguen permitindo u irse a sua casa, metres un pouco mais de educacion e menos chleria non lle viria mal

DEIXAR UN COMENTARIO

Please enter your comment!
Please enter your name here