Unha tese doutoral desenvolvida na Universidade de Vigo (UVigo) analiza a influencia de axentes artificiais na resposta dos seres humanos ante situacións de risco colectivo, como o control das pandemias, o proceso de vacinación e o cambio climático.
O autor da tese, Elías Fernández, explicou que, “cada vez con máis frecuencia”, estes escenarios “ven afectados pola presenza de axentes artificiais” mediante sistemas socio-técnicos presentes en distintos niveis da sociedade, segundo recolleu a universidade nun comunicado.
En concreto, o investigador puxo como exemplo as respostas automáticas en centros de atención telefónica, que poden condicionar os tempos de resposta ante unha catástrofe, e de ‘bots’ en Twitter, con capacidade para influír na opinión colectiva ante aspectos como o proceso de vacinación levado a cabo contra a covid-19.
Neste sentido, no marco da investigación, dirixida polos profesores Tom Lenaerts e Juan Carlos Burguillo, efectúanse experimentos económicos de comportamento ante un dilema de risco colectivo cunha coordinación de seres humanos e axentes artificiais para analizar a anticipación nestes contextos.
En primeiro lugar, avaliouse a resposta dos seres humanos ante a incerteza sobre o prazo para evitar a catástrofe e alcanzar o obxectivo colectivo no escenario de risco. Así, observouse que baixos niveis desta falta de determinación temporal non afectan o éxito do grupo para evitar o desastre.
Posteriormente, efectuáronse experimentos nos que os participantes debían delegar, personalizar ou interactuar nun grupo híbrido de axentes e humanos para analizar a influencia dos artificiais. Deste xeito, observouse unha reticencia a delegar as súas competencias a estes mecanismos que se reduciu cando se permitiu aumentar a personalización dos mesmos.
