Abel Caballero critica o “cinismo político” do PP sobre o estado de alarma

Lembra que os mesmos que agora reclaman prolongalo, votaron no seu día en contra.

O alcalde de Vigo, Abel Caballero / Concello.

O alcalde de Vigo e presidente da Federación Española de Municipios e Provincias (FEMP), Abel Caballero, criticou este martes o “cinismo político” do PP e doutros grupos sobre o estado de alarma, e lembrou que os mesmos que agora reclaman prolongalo, votaron no seu día en contra.

Sobre o inminente fin do estado de alarma e sobre as críticas dalgunhas comunidades acerca da ausencia de ferramentas para adoptar medidas restritivas que freen a pandemia, Abel Caballero lembrou que o PP “votou en contra” no Congreso cando, na primeira onda da pandemia, había que renovar o estado de alarma cada quince días, o que obrigaba ao Goberno “a ter que pactar”.

“Agora din que hai que prorrogalo, é o cinismo político do PP e doutras forzas”, afirmou, e respondeu aos gobernantes ‘populares’ que, naquel momento, “tiñan que dicirlle ao seu partido que apoiase o estado de alarma”.

Por outra banda, sobre a reforma do IRPF para acabar cos beneficios da tributación conxunta, Abel Caballero afirmou que a previsión desa reforma “está anulada”, segundo anunciou o propio Goberno de España. “Eu estou satisfeito. A min gústame a tributación que hai, e agrádame que o Goberno de España tomase esa decisión”, resolveu.