A Corporación de Vigo aprobou, cos votos en contra de toda a oposición, unha modificación de crédito para incorporar 13 millóns de euros procedentes de remanentes aos investimentos de 2021. Esta iniciativa recibiu a súa aprobación definitiva no pleno extraordinario celebrado na mañá deste martes, no que o grupo socialista sacou adiante a proposta grazas á súa ampla maioría.
O concelleiro de Facenda, Jaime Aneiros, remarcou que esta modificación de remanentes supón agregar 13 millóns de euros aos 36 millóns tamén procedentes de remanentes cuxo uso foi aprobado a finais do pasado ano para diversas obras. “Continuamos nesa liña de investimento masivo na cidade, somos un modelo de acción política”, destacou.
Aneiros lembrou, como xa adiantou en ocasións previas o alcalde de Vigo, Abel Caballero, que estes fondos servirán para acometer, entre outras actuacións, a segunda fase das ramplas de Gran Vía (entre as rúas Venezuela e Nicaragua). Así mesmo, destinaranse 3 millóns de euros á construción do ascensor ‘halo’ que comunicará a zona de García Barbón co complexo de Vialia, e o investimento completarase con outros 4 millóns o ano que vén.
Estes remanentes tamén irán destinados a provisionar partidas para outras actuacións, como o Paseo de Bouzas, o pavillón de Quirós, os campos da Guía e Fragoselo, e diversas humanizacións.
OPOSICIÓN
Por parte do BNG, Xabier Pérez Igrexas, considerou que esta proposta do Goberno local é “negacionista”, posto que “propón usar os remanentes coma se non houbese unha pandemia e unha dura crise social e produtiva”. Neste sentido, tras criticar que “insistiron en dicir que non a todas as propostas da oposición”, considerou que as accións expostas “só van multiplicar a propaganda oficial”.
De forma similar, o edil da Marea de Vigo, Rubén Pérez, lamentou “o discurso erróneo” do PSOE, xa que fala de “obras inaprazables” en referencia a “cambiar un céspede dun campo de fútbol”. “Para nós o inaprazable é que as familias coman, botar unha man ao comercio e a hostalaría local, completar o catálogo de axudas sociais e axudas ao sector cultural”, resolveu.
Finalmente, o portavoz do PP Alfonso Marnotes, lamentou que o Goberno local deixou en 2020, en plena pandemia, case 120 millóns de euros do orzamento sen executar. Tras iso, insistiu en que “hai dúas diferenzas” entre o Goberno de Vigo e os outros gobernos socialistas de Galicia: “Eles negáronse a entregar os remanentes a Madrid e eles si están a axudar ás empresas das súas localidades, todos menos vostede, vostede é unha anomalía política”.
En resposta ás cuestións denunciadas por PP, Marea de Vigo e BNG, Aneiros lamentou a “actuación coral do tres tenores da oposición”, e considerou que con iso “cada un trata de esconder as súas vergoñas”. En contrapartida, defendeu que Vigo usa os remanentes “para xerar emprego e mellorar a calidade de vida das persoas”.