InicioEconomíaO Porto de Vigo tratará no seu consello de administración a extinción...

O Porto de Vigo tratará no seu consello de administración a extinción da concesión a Vulcano

O pasado 7 de abril, o Porto de Vigo xa confirmou que iniciaría os trámites para executar a extinción da concesión.

PUBLICADO O

A Autoridade Portuaria de Vigo (APV) levará ao seu consello de administración deste venres a incoación do expediente para declarar a extinción da concesión administrativa das antiga Factorías Vulcano (agora Estaleiros San Enrique).

Así consta no punto 12 da orde do día do consello de administración, que está previsto que se celebre este venres a partir das 9,30 horas por videoconferencia. Tal e como se apunta neste apartado, a concesión foi aprobada en xuño de 2009 “con destino á construción e reparación naval”.

O pasado 7 de abril, o Porto de Vigo xa confirmou que iniciaría os trámites para executar a extinción da concesión. Ademais, indicou que redactará un novo prego para sacar a concurso a concesión do estaleiro e sinalou que “non se descarta nada” para ese espazo, sempre que sexa “un proxecto viable e xere emprego”.

Este proceso é resultado da resolución do Tribunal de Conflitos de Xurisdición, que a principios de mes ditou sentenza na que declaraba que corresponde á Administración (polo tanto, ao Porto de Vigo) tramitar e resolver o expediente de extinción da concesión do antigo Vulcano.

OPOSICIÓN DA CIG

A CIG considerou que, coa inclusión deste punto na orde do día do consello de administración do porto, o Partido Popular “segue insistindo na súa ofensiva contra o sector naval” a través de “unha estratexia suicida” que busca “substituír un estaleiro centenario” para “gañar uns poucos metros máis de superficie para colectores”.

O sindicato, que está representado no consello de administración por Anxo Igrexas, trasladou a súa oposición “frontal” a esta decisión. Así, entende que “suporá impedir o desenvolvemento dun novo proxecto industrial impulsado pola empresa Mariña Meridional” e “constitúe o primeiro paso para desmantelar o estaleiro e destinar a concesión a usos loxísticos”.

Ante todo iso, anunciou que reclamará a retirada deste punto da orde do día do consello de administración e que esixirá “un compromiso firme e inquebrantable coa continuidade do estaleiro”. “A CIG non vai permitir que acaben afundindo o naval”, selou.

CONFLITO

O conflito ten a súa orixe na liquidación de Factorías Vulcano, un estaleiro con máis de 100 anos de historia no barrio vigués de Teis e que, tras anos de problemas económicos, entrou no seu último concurso de acredores en 2011. En xullo de 2019 declarouse disolta a sociedade e abriuse fase de liquidación, cuxo plan foi aprobado en novembro dese ano.

O Porto recorreu a aprobación do plan de liquidación ante a Audiencia, ao entender que a concesión non podía ser obxecto de venda porque estaba extinguida, pero o tribunal provincial avalou a decisión do xuíz de primeira instancia. Así, completouse o proceso e as instalacións (xunto coa concesión, que finaliza en 2027) foron vendidas a Mariña Meridional que, precisamente, a finais de marzo completou o pago polo estaleiro, case 8 millóns de euros.

A decisión do Tribunal de Conflitos de Xurisdición pon en xaque agora o futuro do proxecto de Mariña Meridional (sociedade tras a que está o empresario vigués José Alberto Barreras) xa que, aínda que teña as instalacións, non poderá desenvolverse nelas a actividade de construción e reparación naval sen dispor da concesión.

ÚLTIMAS

Asistidas un pai e a súa filla en Vigo tras producirse un incendio na súa vivenda

Dúas persoas, un pai e unha filla, necesitaron asistencia en Vigo este xoves tras producirse...

Emilio Sotelino ou a Asociación de Viúvas Demócratas entre os Vigueses Distinguidos 2024

O pleno de Vigo aprobou este luns por unanimidade nunha sesión extraordinaria os novos Vigueses...

O goberno de Vigo aproba o marco orzamentario ata 2027 e prevé investimentos por valor de 33 millóns cada ano

O alcalde de Vigo, Abel Caballero, anunciou que o goberno local aprobou o marco...

Pechados parques e espazos arbóreos da cidade de Vigo debido ao temporal

O Concello de Vigo restrinxiu por seguridade o acceso aos parques e espazos arbóreos...