InnovaAtlántico celebrará a súa segunda edición dende Vigo

O evento, que terá lugar o 5 e 6 de outubro, será en liña e retransmitirase a través dunha plataforma dixital.

O Porto de Vigo / Autoridade Portuaria.

O salón das novas solucións tecnolóxicas InnovaAtlántico celebrará os próximos días 5 e 6 de outubro a súa segunda edición, que nesta ocasión será en formato en liña, retransmitida desde Vigo a través dunha plataforma dixital.

Así o comunicou a organización deste salón, que indicou que este evento reunirá “todas as novidades relacionadas coa Industria 4.0.“, de forma que darán a coñecer aplicacións das novas tecnoloxías e faranse accesibles novas vías de negocio e de apoio á produción.

O evento virtual funcionará como un salón “convencional, onde os expositores poderán interactuar co visitante virtual”. Ademais, disporá dun pavillón en liña e de estands nos que cada empresa porá a disposición dos asistentes os seus dossieres, vídeos e fotografías. Así mesmo, no auditorio en liña celebrarase un panel formativo que terá un labor “divulgativo”, segundo informou a directora do salón, Raquel Robledo, que destacou que o 2020 “deixou claro que o dixital deixou de ser un obxectivo para ser parte da supervivencia”.

A organización deste salón indicou que escolleu celebrar este salón desde Vigo por ser “un dos principais centros de produción do noroeste da Península Ibérica” e atoparse nun lugar privilexiado de relación con Portugal e o resto do Arco Atlántico e América.

“Ademais, a cidade conta cunha universidade moi activa, centros tecnolóxicos en distintos sectores como a automoción ou a industria conserveira e centros de investigación punteiros a nivel internacional relacionados co mar ou a industria aeroespacial”, selou.