InicioSociedadeOutras cinco familias de galegos represaliados súmanse á 'querela arxentina' polos crimes...

Outras cinco familias de galegos represaliados súmanse á ‘querela arxentina’ polos crimes franquistas

Este xoves presentaranse as novas denuncias no consultado de Arxentina en Vigo.

PUBLICADO O

- Advertisement -

A causa criminal 4.591/2010, coñecida como a ‘querela arxentina’ e que se segue nun xulgado de Buenos Aires por crimes de lesa humanidade, sumará este xoves cinco novas denuncias, coa adhesión doutras tantas familias de homes galegos represaliados e asasinados o réxime franquista.

Este xoves presentaranse as denuncias no consultado de Arxentina en Vigo, por parte dos familiares de Celestino Carbia, alcalde de Valga e fusilado en 1937; Bernardo Mato, mestre de Teo e vítima dun asasinato extraxudicial en 1936, tras ser detido e interrogado por falanxistas; Carlos Abella, veciño de Ponteceso e sindicalista da CNT, condenado a pena de morte conmutada por cadea perpetua; José Lijó, veciño de Ribeira e membro do Comité de Defensa da República, fusilado en Santiago en 1937; e José Sieira, tamén de Ribeira e asasinado en 1937 pola súa vinculación coa CNT.

As familias contan co asesoramento de CeaQua, Iniciativa Galega pola Memoria e Histagra, e a presentación das denuncias corre a cargo da Comisión de Dereitos Humanos do grupo Avogados Novos de Vigo.

Segundo sinalou a avogada Irene Francés, esta querela supón unha importante ferramenta xurídica “na loita contra as políticas do Estado español baseadas na impunidade, o silencio, o esquecemento e a falta de investigación xudicial destes crimes“, e as familias reclaman así “o seu dereito á verdade, a xustiza, a reparación e garantías de non repetición”.

Estas querelas súmanse ás que xa presentaron antes outras familias, como as de Alexandre Bóveda, Amancio Caamaño e Ramiro Paz, en xaneiro dese ano, para esixir que se coñeza a verdade sobre os asasinatos da Caeira (Pontevedra) en 1936, e para que se revoguen as súas condenas.

Estas reclamacións xurdiron tras o proceso iniciado en 2019 pola Deputación de Pontevedra, que anunciou a súa intención de “acompañar” e porse a disposición de todas as persoas afectadas por aqueles crimes do franquismo.

Así, este xoves formalizaranse as denuncias doutras cinco familias, que se suman aos escritos presentados por decenas de familiares e achegados dos represaliados polo réxime de Franco en Galicia. Á querela arxentina tamén se sumaron o ano pasado os descendentes dunha vintena de prisioneiros galegos enviados pola ditadura a campos de concentración nazis.

ÚLTIMAS

Volven prender lume en Chandebrito oito anos despois da traxedia na que morreron dúas persoas

Un lume forestal que comezou onte á noite en Chandebrito (Nigrán) queimou 0,73 hectáreas...

Caballero, contra as peaxes na A-52 e A-55: “As construtoras que se dediquen a contruír”

O alcalde de Vigo, Abel Caballero, arremeteu este venres contra a proposta da patronal...

Abel Caballero tacha de “bobada” a proposta do PP para o centro de asociacións

O alcalde de Vigo, Abel Caballero, negou este venres que poña problemas á Xunta...

A praia a Calzoa, a difícil convivencia entre liberdade canina e respecto pola natureza

Celebridades como o exfutbolista Vlado Gudelj e o músico Abraham Cupeiro participan na campaña...