O BNG rexistra iniciativas no Congreso para que o Goberno central garanta a continuidade da antiga Vulcano

Unha sentenza do Tribunal de Conflitos de Xurisdición avala a extinción da concesión dos terreos do estaleiro.

Acceso principal do estaleiro vigués Factorías Vulcano, no barrio de Teis / Europa Press.

O deputado do Bloque Nacionalista Galego (BNG) Néstor Rego presentou no Congreso unha batería de iniciativas para reclamar que o Goberno estatal “adopte as medidas necesarias para garantir a continuidade da actividade de construción e reparación naval” nas antiga Factorías Vulcano (agora Astilleros San Enrique).

Estas iniciativas xorden por mor da sentenza do Tribunal de Conflitos de Xurisdición que avala a extinción da concesión dos terreos do estaleiro. A partir desta resolución, o Porto de Vigo confirmou que redactará un novo prego para sacar a concurso a concesión do estaleiro, e sinalou que “non se descarta nada” para ese espazo.

Segundo o BNG, tras a compra do estaleiro por parte de Marina Meridional, “comezou a ofensiva adminsitrativa e legal por parte do por aquel entón presidente da Autoridade Portuaria de Vigo, Enrique López Veiga”. Con iso, denunciou, o obxectivo era “terminar coa actividade de construción e reparación naval” e destinar esta contorna “a outros usos, singulamente, a loxística de colectores”.

Neste marco, o Bloque insistiu en que a posibilidade de destinar ese espazo a outros usos “suporía un duro golpe para a industria naval viguesa e empresas auxiliares”. Por iso, reclamou ao Goberno que adopte “todas as medidas necesarias para que se garanta” a actividade de construción e reparación naval na concesión portuaria do estaleiro.

Desta forma, a formación nacionalista incidiu en que é preciso manter a actual concesión como mínimo ata 2027“. Ademais, rexistrou preguntas para coñecer cales son as medidas que ten previsto adoptar o Goberno respecto desta situación; así como para saber que prioridades de uso terán as instalacións no suposto dunha nova concesión.