O alcalde de Vigo, Abel Caballero, reiterou este xoves que non coñece “ningunha demanda” da planta de Stellantis (antes PSA Peugeot Citroën) sobre a necesidade de dispor de liña de moi alta tensión, e volveu a sinalar que está “a disposición” da empresa.

Así o trasladou o rexedor olívico nunha rolda de prensa na que foi preguntado por unha reunión mantida coa secretaria de Estado de Enerxía, Sara Aagesen. Cuestionado acerca de se tratara sobre a liña de moi alta tensión para Stellantis coa representante do Goberno, Caballero foi categórico: “PSA non me comunicou esa reclamación, dígoo por quinta vez”.

“Eu son o alcalde da cidade de Vigo e non teño ningunha demanda nese sentido. A miña cooperación con PSA (Stellantis) é total e envorcareime en todo o que me transmita, pero agora non teño esa demanda”, insistiu.

A preguntas dos medios sobre a reunión mantida fai uns dous anos co director da factoría, Ignacio Bueno, na que se abordou esa cuestión e tras a cal o propio rexedor anunciou que se solucionaría en cuestión de “meses”, Abel Caballero explicou que fixo a xestión co Goberno pero a empresa “non respondeu sobre o que lle transmitiu o Goberno”.

Finalmente, engadiu que, “igual que se reuniu con Feijóo” para abordar a cuestión da liña de moi alta tensión, a dirección de Stellantis ten ao rexedor “á súa disposición” para trasladarlle as súas demandas.