A Xunta de Goberno Local do Concello de Vigo deu luz verde este mércores á adxudicación da obra de ‘humanización’ do último tramo de García Barbón, o que discorre entre Rosalía de Castro e a rotonda de Isaac Peral, despois dun “atraso de dous anos” do que o alcalde, Abel Caballero, culpou á Xunta de Galicia.
Nunha rolda de prensa, o rexedor informou da adxudicación desta obra, por un importe de 1,7 millóns de euros, e terá un prazo de execución de 8 meses, aínda que non se actuará sobre o conxunto escultórico situado na rotonda, tras os reparos feitos polo departamento de Patrimonio da Xunta. “Xa a podiamos ter acabada, pero a Xunta parouna co argumento da rotonda”, denunciou Caballero.
Segundo lembrou, o goberno autonómico vetou a actuación nesa rotonda ao impedir o traslado da escultura de García Barbón, un monumento que nin sequera se realizou para ese emprazamento, senón para a confluencia de García Barbón con Alfonso XIII, recalcou.
En todo caso, o alcalde precisou que a reforma non actuará sobre a escultura, e suporá a renovación de pavimento, beirarrúas, iluminación e outros elementos, para unha “humanización de altísimo nivel”.
Caballero insistiu en denunciar que a obra sufriu un atraso de 2 anos pola “paralización da Xunta”, aínda que o goberno galego sostén que o Concello de Vigo ten luz verde para realizala desde 2018, condicionada a non actuar no monumento a García Barbón.
En outubro de 2018 Patrimonio autorizou a obra excepto no ámbito da rotonda e reclamou que se fixese un proxecto de sondaxes arqueolóxicas. Unha vez realizada esa intervención, o Concello recibiu resolución favorable da Xunta, en outubro de 2019, na que se advertía de que debía seguir o control arqueolóxico.
Con todo, o Concello non aprobou o proxecto da ‘humanización’ ata setembro de 2020, momento no que se empezou a tramitar o proceso de adxudicación, que culminou este xoves, ao encargarlle os traballos á empresa PRACE, Servizos e Obras.
