InicioEconomíaLuz verde ao Porto de Vigo para a extinción da concesión de...

Luz verde ao Porto de Vigo para a extinción da concesión de Vulcano

O Tribunal de Conflitos de Xurisdición ditou sentenza. A decisión pode pór en risco o proxecto industrial. Sindicatos ven a extinción da concesión un "novo golpe".

PUBLICADO O

O Tribunal de Conflitos de Xurisdición ditou sentenza na que declara que corresponde á Administración (polo tanto, ao Porto de Vigo) tramitar e resolver o expediente de extinción da concesión do antigo estaleiro Factorías Vulcano, unha decisión que pode pór en risco o proxecto industrial para esas históricas instalacións, agora en mans da sociedade Marina Meridional.

A sentenza estima o conflito de xurisdición entre a Delegación do Goberno en Galicia e o xulgado Mercantil 3 de Pontevedra acerca da concesión (en terra e na lámina de auga) do centenario estaleiro.

Así, mentres que o xulgado incluíu esa concesión no proceso de liquidación do estaleiro e na posterior venda a Marina Meridional, a Delegación do Goberno e o Porto de Vigo sosteñen que, unha vez disolta a sociedade Factorías Vulcano, dita concesión quedou extinguida.

Agora, o Tribunal de Conflitos de Xurisdición avalou as teses da Avogacía do Estado (e do Porto), e declarou que é competencia do organismo portuario tramitar a extinción. De feito, na súa sentenza, sinala que o Mercantil 3 de Pontevedra “invadiu potestades” da Autoridade Portuaria sobre a xestión do dominio público.

Este tribunal sinalou que a concesión obxecto de polémica réxese pola lexislación de Portos do Estado e non pola normativa de contratos do sector público, á vez que lembrou que “non hai elementos” na Lei Concursal que atribúan ao xuíz do Mercantil a competencia sobre o réxime de concesión demanial.

CONFLITO

Este conflito ten a súa orixe na liquidación de Factorías Vulcano, un estaleiro con máis de 100 anos de historia no barrio vigués de Teis e que, tras anos de problemas económicos, entrou no seu último concurso de acredores en 2011. En xullo de 2019 declarouse disolta a sociedade e abriuse fase de liquidación, cuxo plan foi aprobado en novembro dese ano.

O Porto recorreu a aprobación do plan de liquidación ante a Audiencia, ao entender que a concesión non podía ser obxecto de venda porque estaba extinguida, pero o tribunal provincial avalou a decisión do xuíz de primeira instancia. Así, completouse o proceso e as instalacións (xunto coa concesión, que finaliza en 2027) foron vendidas a Marina Meridional que, precisamente, a finais de marzo pasado completou o pago polo estaleiro, case 8 millóns de euros.

A decisión do Tribunal de Conflitos de Xurisdición pon en xaque agora o futuro do proxecto de Marina Meridional (sociedade tras a que está o empresario vigués José Alberto Barreras) xa que, aínda que teña as instalacións, non poderá desenvolverse nelas a actividade de construción e reparación naval sen dispor da concesión.

O Porto de Vigo mantivo, desde a orixe do conflito, que esa concesión debe retornar e, no seu caso, saír de novo a concurso. De feito, o propio José Alberto Barreras sinalaba hai uns días que se o Tribunal fallaba a favor das teses do organismo portuario, tratarían de negociar unha nova concesión, mesmo de máis superficie que a actual.

Barreras anunciou entón que as instalacións, rebautizadas como Astilleros San Enrique, estudan máis dunha trintena de propostas de contratos de construción e reparación naval, por valor duns 240 millóns de euros.

Así mesmo, recoñecía que a incerteza sobre a concesión provocaba reticencias entre posibles clientes, polo que está por ver como afectará a sentenza do Tribunal de Conflitos de Xurisdición ao futuro do estaleiro.

SINDICATOS

Os principais sindicatos da comarca de Vigo lamentaron o “novo golpe” á industria naval e reclamaron á Autoridade Portuaria que, xunto aos novos propietarios das instalacións, busque unha solución para manter a actividade industrial no recinto.

CC.OO. lamentou que este conflito se resolveu “da peor maneira” para os intereses da industria naval da comarca viguesa e de toda Galicia, e cualificaron a resolución como “moi negativa e prexudicial”.

UGT apuntou que “os claros prexudicados” da decisión do tribunal son os traballadores, xa que a sentenza provocará “un atraso importante na reactivación do estaleiro”.

Mentres, a CIG tamén lamentou a resolución do Tribunal de Conflitos de Xurisdición que, na súa opinión, evidencia “o nulo interese do Estado en apoiar o sector naval vigués“, a pesar de que é unha industria “estratéxica” en Vigo e en Galicia, así como “motor” do que dependen miles de empregos.

ÚLTIMAS

Asistidas un pai e a súa filla en Vigo tras producirse un incendio na súa vivenda

Dúas persoas, un pai e unha filla, necesitaron asistencia en Vigo este xoves tras producirse...

Emilio Sotelino ou a Asociación de Viúvas Demócratas entre os Vigueses Distinguidos 2024

O pleno de Vigo aprobou este luns por unanimidade nunha sesión extraordinaria os novos Vigueses...

O goberno de Vigo aproba o marco orzamentario ata 2027 e prevé investimentos por valor de 33 millóns cada ano

O alcalde de Vigo, Abel Caballero, anunciou que o goberno local aprobou o marco...

Pechados parques e espazos arbóreos da cidade de Vigo debido ao temporal

O Concello de Vigo restrinxiu por seguridade o acceso aos parques e espazos arbóreos...