O BNG propón unha Mesa Galega de Automoción e pide a intervención de Barreras

Os nacionalistas levan a pleno medidas para afrontar "a crise industrial e comercial" que atravesa a cidade de Vigo.

O concelleiro do BNG en Vigo, Xabier P. Igrexas, acompañado polos deputados autonómicos Alexandra Fernández e Luís Bará / BNG.

O BNG levará ao próximo pleno do Concello de Vigo, que se celebra este mércores, unha moción con medidas para facer fronte “á crise industrial e comercial que atravesa a cidade”, entre as que se inclúen un Plan de Reindustrialización, a intervención pública de Barreras e a creación dunha Mesa Galega de Automoción.

O concelleiro do BNG de Vigo, Xabier Pérez Igrexas, subliñou que “importantes sectores como a automoción ou a construción naval afrontan situacións críticas, e o comercio e a hostalaría seguen padecendo a falta dun apoio efectivo por parte das Administracións públicas”.

Neste marco, os nacionalistas propoñen impulsar un Plan de reactivación industrial e económica, dotado con polo menos 10 millóns de euros; crear unha Mesa Galega de Automoción e o despregamento dunha tarifa eléctrica industrial galega; e reducir o IVE do sector das barbarías do 21 ao 10 por cento.

Ademais, aposta por reclamar aos gobernos galego e estatal que interveñan en Hijos de J. Barreiras para convertelo nun estaleiro público ou semipúblico. Igualmente, volverá insistir en que o Concello de Vigo despregue axudas directas para o pequeno e mediano comercio local e a hostalaría. “Con esta moción, o BNG quere pór encima da mesa a principal preocupación das viguesas e os vigueses que é a situación económica, produtiva e laboral da cidade, e pedir medidas concretas e reais para atallar os efectos desta crise”, concluíu o edil.