O sector cultural vigués reactívase trala inactividade das últimas semanas e faino volvendo á carga cunha presentación editorial polifacética e cargada de música. Ferreñas e Rock and Roll é o nome do título escollido por Baía Edicións para botar a andar de novo o circuíto literario da cidade olívica, que albergará unha xornada na Libraría Cartabón o xoves día 11 de marzo ás 20.00 horas.
O establecemento da rúa Urzáiz contará, por suposto, coa presenza das autoras da obra: a ilustradora, investigadora e música Laura Romero, e da profesora e tradutora Iria Pedreira. Por riba, e para completar o cariz musical do acto, estará tamén a viguesa Pili Dios, baixista de Desvirgheitors, grupo nacido en 1986 en Vigo e considerado o pioneiro do punk en Galicia.
Ferreñas e Rock and Roll pódese entender como unha “evolución” do proxecto Músicas Galegas Ilustradas, creado en 2017 “sen máis pretensión que a de visibilizar o papel das mulleres no panorama musical galego actual”. Segundo explican dende Baía, Músicas Galegas Ilustradas foi medrando “ata converterse nunha extensa serie de retratos de músicas que aínda hoxe segue a expandirse”, todo para demostrar e retratar o importantre papel da muller no panorama musical galego.