O Ministerio de Transportes, Mobilidade e Axenda Urbana (Mitma) iniciou a redacción do anteproxecto do novo viario de conexión entre a autovía A-52 e a estrada N-120 en Ponteareas, provincia de Pontevedra.
A estrada N-120 ao oeste de Ponteareas, soporta unha intensidade elevada de tráfico, debido á mobilidade que se xera entre este municipio e a área metropolitana de Vigo.
Por este motivo, é necesario estudar unha nova conexión coa A-52 na contorna da ligazón desta última coa estrada PO-403, permitindo así redistribuír os movementos, diversificando os tráficos existentes.
Os traballos definirán a alternativa máis adecuada para o novo viario, mediante o diagnóstico da situación da área de estudo e obtención dos posibles corredores para acoller a nova infraestrutura, a definición das alternativas de trazado e posterior selección da máis adecuada para os obxectivos fixados.
Así mesmo, desenvolverase a tramitación da avaliación ambiental correspondente. O orzamento estimado da actuación ascende a 7 millóns de euros, aínda que este valor irase axustando ao definirse a alternativa.