Rexistradas 600 sinaturas de veciños da Ceboleira para esixir á Deputación que acabe as obras

"É unha rúa moi transitada porque comunica O Calvario con Avenida do Alcalde de Lavadores, e nin o Concello nin a Deputación fixeron nada", denunciou o líder do PP local, Alfonso Marnotes.

Veciños da rúa Ceboleira de Vigo rexistran centos de firmas. PP

Veciños da rúa Ceboleira de Vigo rexistraron na sede olívica da Deputación de Pontevedra as “case 600” firmas que recolleron para esixir que a Administración termine de arranxar esta vía provincial que “leva meses esnaquizada polas obras”.

Así o comunicou o Partido Popular, despois de que os deputados Alfonso Marnotes e Jorge Cubela, xunto ao concelleiro Jesús Marco González, acompañasen este luns a presentar as firmas aos veciños desta rúa, que están a sufrir “graves trastornos”por esta situación.

“É unha rúa moi transitada porque comunica O Calvario con Avenida do Alcalde de Lavadores, e nin o Concello nin a Deputación fixeron nada”, denunciou Marnotes, que asegurou que “os veciños están fartos”, ao que se suma a xeración de tráfico e os cambios de ruta dos autobuses urbanos.

O presidente da asociación de veciños As Fontes-Vilar-Lavadores lamentou que as administracións non lles “fan caso”, ao que a veciña Bibiana Alonso engadiu que levan “así tres meses”. “Na nosa rúa, os tubos da auga e do gas están ao aire e é deprimente”, rematou.