A Real Academia Galega inaugurará este martes a ‘Primavera das Letras’ dedicada á escritora Xela Arias, protagonista do 17 de Maio deste ano, no CEIP Sárdoma-Moledo, o centro de Vigo no que estudou a autora.
O acto, que arrincará ás 10,30 horas co descubrimento dunha placa de homenaxe á escritora, contará coa presenza do presidente da Academia, Víctor Freixanes, e da académica Fina Casalderrey, acompañados de familiares das propia Arias e da comunidade educativa do centro.
O proxecto está dirixido ao alumnado de infantil e primaria e ofrece unha serie de recursos lúdicos e didácticos sobre a vida e obra de Xela Arias, que estarán dispoñibles a través da web ‘primaveradasletras.gal’.
Esta nova edición súmase á oferta dixital da web institucional da RAG sobre a homenaxeada das Letras Galegas 2021, onde xa está plasmada a biografía asinada por Ana Romaní, entrevistas e unha galería de retratos de Arias realizados por Xulio Gil.