Os servizos de emerxencias rescataron na tarde deste domingo a unha persoa que caeu nunha zona rochosa e de difícil acceso detrás do Museo do Mar, en Vigo.
Segundo informa o 112 Galicia, ocorreu pouco antes das 19,00 horas, cando un equipo do 061 contactou coa central de emerxencias para solicitar medios de rescate para unha persoa ferida tras sufrir a caída.
Seguidamente, o 112 avisou aos bombeiros de Vigo, á Policía Local e a Protección Civil da cidade olívica. Unha vez no lugar, os equipos de intervención empregaron unha padiola ríxida para evacuar á persoa ferida ata a ambulancia do 061, na que foi posteriormente trasladada a un centro médico.
