O Consorcio da Zona Franca de Vigo iniciou a construción de 14 naves no Parque Empresarial de Porto do Molle, na localidade pontevedresa de Nigrán, as cales prevé que estarán dispoñibles no verán de 2022.

Trátase de 14 naves polivalentes –de entre 300 e 500 metros cadrados–, 28 talleres, 14 oficinas e 68 prazas de aparcadoiro, informou a Zona Franca, que indicou que estas obras contan cun investimento total de 6,3 millóns de euros e o prazo de execución é de 18 meses.

En concreto, o espazo destinado a nave atoparase na planta baixa, con acceso para camións; os talleres na planta baixa e a primeira planta, con acceso peonil; e as oficinas na segunda planta, con acceso independente desde unha zona común.

Durante unha visita este mércores ás obras, o delegado do Estado no Consorcio, David Regades, explicou que algunhas empresas xa mostraron o seu interese por estes espazos polo que, “mentres se desenvolve o proceso de construción, Zona Franca abrirá a posibilidade de que avancen as súas intencións de alugalas para ir reservando os espazos”.