O Concello de Vigo instalou dez novas cámaras que transmiten en directo o estado do tráfico, con imaxes en tempo real e en alta resolución, e que poden verse na aplicación municipal App Vigo (proximamente tamén na web do Concello).
O alcalde da cidade, Abel Caballero, presentou este novo servizo de información, tras visitar a sala de pantallas de Xestión da Mobilidade no Concello, e explicou que se instalaron estas novas cámaras, cun investimento de 4.000 euros, que permiten visualizar a situación de puntos neurálxicos da circulación.
Así, mediante esas cámaras poderá seguirse en directo a situación do tráfico en Travesía con Jenaro de la Fuente, Gran Vía con Tarragona, Praza de España, Praza de América, Gran Vía con Lepanto, Castrelos con Arquitecto Palacios, Avenida Castelao, rotonda do Bicentenario, Avenida de Madrid e Pizarro con Vázquez Varela.
Na actualidade Vigo conta con máis dun centenar de cámaras que rexistran imaxes do tráfico, das que 48 son de control de tráfico urbano e 61 para o control de interior e exterior de túneles.