A Oficina de Atención á Vítima de Vigo implanta un servizo de cita previa

A implantación deste sistema enmárcase nas medidas postas en marcha na administración de xustiza para facer fronte á pandemia de COVID-19.

Xulgados / Europa Press.

A Oficina de Atención á Vítima e á Cidadanía de Vigo empezou a funcionar este mércores con cita previa a través de internet, segundo informaron fontes do Tribunal Superior de Xustiza de Galicia (TSXG).

Este novo sistema permite facilitar os trámites aos usuarios e evita que poidan reunirse varias persoas nas instalacións xudiciais, ademais de aforrarse os desprazamentos innecesarios. Así, os interesados poderán fixar as súas citas a través da páxina web www.xustiza.gal, e poderán reservar quenda para consulta co psicólogo e a traballadora social, así como para os servizos xerais que se prestan en horario de mañá.

Nese portal de internet poderanse descargar os modelos que hai que cumprimentar para realizar xestións relacionadas con procesos monitorios, solicitudes xerais (cambios de domicilio, achega de documentos a procedementos xudiciais, alegacións, acompañamento de escritos…), peticións de execución de sentenzas ou demandas de internamentos psiquiátricos.

Todos estes formularios deben entregarse debidamente cubertos, sen cita previa, na Oficina de Rexistro e Repartición dos xulgados de Vigo, en horario de 9,00 a 15,00 horas.

Por outra banda, as tramitacións de xustiza gratuíta deben realizarse a través do Colexio de Avogados de Vigo, e os certificados de antecedentes penais e delitos sexuais pódese solicitar de maneira telemática a través da web do Ministerio de Xustiza (ou presencialmente no rexistro de Facenda).

O sistema de atención mediante cita previa por internet xa está a funcionar tamén na Oficina de Atención á Vítima e ao Cidadán de Pontevedra, e estenderase ao resto de Oficinas de Galicia en próximos días. A implantación deste novo servizo, levada a cabo desde a Axencia para a Modernización Tecnolóxica de Galicia (AMTEGA), enmárcase nas medidas postas en marcha na administración de xustiza para facer fronte á pandemia de COVID-19.