Axentes da Policía Local de Vigo detiveron a dous homes, M.A.M.H., de 22 anos e natural de Madrid, e A.M., de 25 anos e natural de Marrocos, como presuntos autores dun delito de asalto a unha vivenda.
Segundo informaron fontes policiais, os feitos tiveron lugar na noite deste xoves, cando o 092 recibiu unha chamada dunha testemuña alertando de que dous homes estaban a violentar a porta de acceso a unha vivenda na rúa Porto Rico, dándolle patadas.
Ata o lugar desprazouse unha dotación que comprobou que a porta, que presentaba un golpe á altura da fechadura, estaba medio aberta e que alguén desde o interior trataba de pechala para impedir o acceso aos axentes.
Os funcionarios empuxaron e entraron na vivenda, onde atoparon dous homes sentados nas escaleiras de acceso ao segundo piso. Así mesmo, tras inspeccionar o interior, comprobaron que había outra porta, de madeira, que tiña a fechadura totalmente rebentada, polo que procederon á detención dos dous sospeitosos.
SEGURIDADE VIARIA
Por outra banda, a Policía Local de Vigo tamén informou da tramitación de dilixencias contra varios condutores por supostos delitos e infraccións contra a seguridade viaria.
Así, na madrugada do pasado martes acudiron á rúa Ecuador, onde se produciu unha colisión. Un dos conductors implicados fuxiu, levando enganchado na súa bóla de remolque o parachoques do outro vehículo.
Poucos minutos despois, o causante do sinistro, E.S.C., vigués de 45 anos, foi localizado e, ao identificalo, a Policía decatouse de que tiña síntomas de estar baixo os efectos do alcol. Este extremo confirmouse cando lle realizaron a proba de alcoholemia, que deu un resultado de 0,94 e 0,98 mg/l.
Así mesmo, o 092 identificou o mércores a unha condutora de 29 anos de idade, D.F.G.S., natural de Uruguai, que circulaba pola rúa Numancia. Ao comprobar os seus datos, os axentes constataron que non tiña carné, aínda que a implicada asegurou que fixera o exame de conducir e que lle notificaron que aprobara, afirmación que foi desmentida tras unha consulta coa base de datos da DXT.
Noutra intervención similar, ese mesmo día axentes da Policía Local deron interceptaron a outro condutor, F.M.H.C., de Vigo e de 44 anos de idade, na Estrada do Zondal. Os funcionarios comprobaron que lle constaba unha perda de vixencia do carné.
Finalmente, a Policía informou da apertura de dilixencias contra un condutor vigués de 28 anos de idade, F.J.A.C., que circulaba pola Estrada de Valadares a última hora da tarde do mércores, e que tiña permiso de conducir AM (só para ciclomotor), que non lle faculta para conducir un turismo. Ademais, dáse a circunstancia de que o coche tiña a ITV caducada.