Os voos no aeroporto de Vigo caen á metade no ano da Covid

En conxunto, os aeroportos galegos pechan 2020 cun 70% menos de pasaxeiros.

Aeroporto de Vigo / Europa Press.

As restricións de mobilidade derivadas das medidas para tratar de conter a pandemia de covid-19 durante o ano 2020 tiveron un importante efecto nos aeroportos galegos, que pecharon o exercicio cun descenso na cifra de viaxeiros que rolda o 70% nos tres terminais.

En concreto, segundo os datos publicados por Aena, ao longo do ano 2020, o aeroporto de Santiago recibiu 935.394 pasaxeiros, o que supón case un 68% dos que fixeron uso destas instalacións o ano anterior. Así, o ano da pandemia non permitiu ao Rosalía de Castro alcanzar nin sequera o millón de usuarios, cando en 2019 superara os 2,9 millóns.

No caso do aeroporto da Coruña, o descenso na cifra de viaxeiros foi do 67,7%, ata os 436.775. O aeródromo de Vigo quedou, pola súa banda, con algo máis de 303.400 usuarios, un 70% menos que en 2019.

Na mesma liña, os voos operados en Santiago foron 10.949, un 51,1% menos, mentres que na Coruña operáronse 11.190, un 34,9% menos. No aeroporto de Vigo o descenso foi do 51,4%, ata os 5.597 voos operados.

DEIXAR UN COMENTARIO

Please enter your comment!
Please enter your name here