Dous mozos foron detidos nos últimos días na cidade de Vigo por agredir a axentes da Policía Local cando procedían a identificalos por non levar máscara na vía pública.

Os arrestos producíronse despois de que os dous mozos fosen localizados sen máscara na vía pública. O primeiro tivo lugar o día de Fin de Ano, cando, ás 18,15 horas, unha patrulla da Policía Local de Vigo desprazouse á rúa Rosalía de Castro tras recibir unha denuncia de que nun grupo de mozos había algún que se atopaba sen máscara na vía pública.

No lugar, os axentes requiriron a un dos mozos que se puxese a máscara, ao que este negouse “de maneira tallante”, do mesmo xeito que se opuxo a identifiarse cando os policías llo solicitaron.

Nese momento, continúa o relato policial, outro mozo que estaba nas inmediacións dirixiuse aos axentes para facilitarlle o DNI do individuo, que reaccionou propinando un lapote aos axentes para quitarlle a documentación.

O arrestado, de 26 anos de idade, continuou coa súa actitude e chegou mesmo a lanzar varias puñadas aos policías, que terminaron por reducilo para proceder á súa detención.

Un día máis tarde, outro home que se enfrontou aos axentes que lle recriminaban que non usase máscara converteuse no primeiro detido do ano 2021 en Vigo.

A detención produciuse ás 07,05 horas na rúa Romil, lugar ao que se desprazaron axentes da policía municipal tras recibir unha chamada dun veciño que denunciaba a presenza dunha persoa que estaba interrompendo o descanso na zona.

Unha vez alí, a patrulla atopou un home na entrada dun garaxe que mostraba “unha actitude desafiante e agresiva”. Atopábase sen máscara alegando que o motivo era “que estaba a fumar un porro”.

O individuo, de 33 anos de idade e veciño de Vigo, chegou a encararse cos axentes, aos que agrediu cun golpe no peito. Unha vez reducido, o home foi arrestado.

OUTROS CATRO ARRESTOS

Ademais, outras catro persoas foron detidas pola Policía Local de Vigo desde o mércores. Ese día, unha parella foi arrestada tras protagonizar unha pelexa na rúa Rosalía de Castro.

Horas antes de despedir 2020, o condutor dunha motocicleta foi arrestado tras sufrir unha caída ao pilotar o vehículo baixo os efectos do alcol.

Por último, outro home foi detido por agredir a súa parella na tarde do venres. Tras desprazarse ao lugar, o arrestado dixo aos axentes que pegaba á súa muller porque “era súa”. A vítima foi trasladada un hospital para recibir atención médica.