O concerto de Ecléctica Ensemble da Orquestra Sinfónica de Galicia previsto para este xoves no Teatro Afundación de Vigo aprazouse debido á evolución da pandemia.
Esta medida foi adoptada en consonancia coas directrices e restricións establecidas para conter os contaxios de COVID-19, segundo detallou Afundación nun comunicado. Deste xeito, o evento será reprogramado cando a situación sanitaria o permita.
As persoas que xa adquirisen a súa entrada para o evento serán contactadas por Afundación, que lles trasladará as posibilidades das que dispoñen. Ademais, procederase á devolución do importe da mesma ou o abono correspondente se o concerto non se celebra proximamente debido ás restricións sanitarias.
Así mesmo, a Obra Social de Abanca analiza o impacto das novas medidas adoptadas na súa programación para ofrecer as maiores garantías ao público.